شارى پیشەسازیى نەک ناوچەى پیشەسازیى

عبدالرحمن صدیق

دوا بەدواى دەرچوون و پەسەندکردنى یاساى وەبەرهێنان لەهەر وڵاتێکدا ، یەکسەر کۆمپانیا بیانییەکان و سەرمایەدارانى ناوخۆ دەکەونەخۆ بۆ دامەزراندنى کارگەو دەستکردن بەپڕۆژەکانیان، بۆیە لەم حاڵەتەدا دەبێت شارێکى پیشەسازیى یان زیاتر بنیات بنرێت لەهەر هەرێم و وڵاتێکدا لەبەر ئەم هۆیانەى لاى خوارەوە:-

1- رێگرتن لەپەرش و بڵاویى کارگەکان.

2- کەمکردنەوەى پیس بوونى ژینگە، لەڕێگەى کردنەوەى کارگەکان لەشارێکداو، دوورخستنەوەیان لەدانیشتوانى شارەکان.

3- دۆزینەوەى هەلى زیاترى کارکردن بۆ بێکاران.

4- بەئاسانى خزمەتگوزاریى پێویست لەشارێکدا دابین دەکرێت بۆ کارگەکان.

5- کارگە جۆراوجۆرەکان بەهۆى بوونیان لەشارێکى پیشەسازیدا ئاسانتر کارى یەکتر تەواو دەکەن.

6- کەمکردنەوەى تێچووى بارکردن و گواستنەوەو هەڵگرتنى بەرهەمى کارگەکان.

7- کەمکردنەوەى تێچوون و زیادکردنى قازانج بەکەمترین تێچوو.

لەشارى پیشەسازیدا کەدەبێت رووبەرێکى زۆر گەورەى بۆ دابین بکرێت، پێویستە ئەم خزمەتگوزاریانە هەبن بۆ تەواوى سەدان کرێکارو فەرمانبەرو ئەندازیارانەى کەلەوێدا کاردەکەن، وەک:

1- دەزگاى بەرگرى شارستانى.

2- بنکەى پەیوەندیى نێودەوڵەتیى.

3- بانک.

4- بنکەى پۆستەو گەیاندن.

5- چێشتخانە.

6- هۆتێل.

7- بەنزینخانە.

8- مزگەوت و پەرستگا.

9- سەنتەرى تاقیگەى ژینگەیى.

10- تۆڕى رێگاوبانى باش.

11- خزمەتگوزارییە سەرەکییەکانى وەک ئاو، کارەبا.

12- وێستگەى چارەسەرکردنى پاشماوەى کارگەو ئاوەڕۆکان.

13- سەنتەرى بازرگانى و شوێنى حەوانەوە.

14- باخچەو پشتێنەى سەوز.

15- سەنتەرى کارگێڕیى.. هتد

هەروەها جۆرى ئەو کارگانەش دەکرێت پۆلێن بکرێن بۆ کارگەکانى بەرهەمهێنانى چیمەنتۆو مەڕمەڕو سیرامیک و کاشیى و، نیکل و مس و کانزاکانى ترو، ماددە کیمیامییەکان و پلاستیک و نایلۆن.. هتد

قەبارەى ئەو کارگانەش دەکرێت لەهەرسێ ئاستى گەورەو مامناوەندیى و بچووکدا بن.

سەبارەت بەشوێنى ئەو شارە پیشەسازییەش پێویستە رەچاوى ئەم خاڵانەى خوارەوەى تێدا بکرێت:

1- تۆبۆگرافیاى ناوچەکە.

2- ئاڕاستەو جوڵەى با.

3- دووریى لەدانیشتوانەوە بۆ ئەو کارگانەی کەژینگە پیس دەکەن.

4- کارنەکردنە سەر شوێنەکانی دی.

5- ژێرخانى باش لەبوونى پێداویستییە سەرەکییەکان.

6- دوورى لەزەوى و زارە کشتوکاڵییەکان... هتد.

7- دووربوونی لەناوچەی ئاسەوارەکان.

8- لەسەر زەوییەکانی دەوڵەت خۆی بێت نەک هاوڵاتییان ، بۆ کەمکردنەوەی تێچووی تەملیککردن.

9- لەسەر تەوەری شاڕێگە ناوخۆیی و نێودەوڵەتییەکان بێت.

10- نزیک بێت لە ناوچە سنوورییەکان بۆ کاراکردنی ئاڵۆگۆڕی بازرگانیی لەگەڵ وڵاتانی دراوسێدا.

11- نزیک ناوەندی چەندین گوند بێت بۆ جێگیرکردنی دانیشتووانی گوندەکان لەشوێنی خۆیان و، پێکەوەگرێدانی کشتوکاڵو پیشەسازیی و بازرگانیی.

12- دووربوون لەڕێڕەوی رووبارو سەرچاوەکانی ئاو.

بۆ دامەزراندنى ئەم شارى پیشەسازییەش هەماهەنگیى نێوان وەزارەتەکانى پلاندانان و پیشەسازیى و شارەوانیى و ژینگە بەلاى کەمەوە زۆر پێویستە، چونکە شارى پیشەسازیى پێداویستیەکى سەردەمەو، هەردەبێت بنیات بنرێت و، شارەکانیش لەناوچەى پیشەسازیى رزگار بکرێن.